شخبطه 4

فيني احباط مو طبيعي هههه بس عادي تعودت على الاحباط اصلا لو ما يجيني يمكن فيني حاله نفسيه ههههههه
عاد الله يسلمكم اليوم رحت الصاله لقيت اختي تعلم امي عن وحده من بنات رفيجاتها تقول انها تزوجت سالتها من هي ؟
قالت فلانه بنت فلان !! استغربت صراحه هنتفه تزوجت ؟ خبري فيها قبل كم سنه تحبي هههههه لا من صج توها صغيره يعني عمرها بحول 16 سنه
عاد انا سويت فيها مستحمقه بقوه ليش وليش ؟ قالت اوخيتي ان ام البنت لها سنتين ونص منفصله عن زوجها وهي ضايعه بين زوجه ابوها وبيت يدها من امها
ابوها جاب لها ريل وزوجوها يبون الفكه احس اني بمجتمع متخلف
هذا سبب كمل علي يومي على الاحباط

قعدت عندهم شوي بعدين طلعت داري فتحت النت شوي لقيت ثنتين شابكين بربرنا عن كل شيئ بعدها بنص ساعه وزود
نادتني امي وتغديت رحت لقمرهم أشوفها لقيتها مجفيه على كتابها فديت قلبها تحب الدراسه ماطلعت علي هههه
عاد قلت لها عفيه عليج خليج جذي قالت لي ابيج كل تفتخرين فيني وتقولين لي كفو
ياقلبي والله بتخليني اصيح الحين : كفو عليج مليون

رجعت داري جاني بليس الله يلعنه ههههههه
فكر يوديني وفكر ييبني الناس ليش تدخل في حياتنا ؟ كل ياكلون فينا ومايخلون عذروب مايحطونه وكل يرشون بهار هندي على الاخبار
مادري بس احس ان غايتهم اصعب من كلمه تطنيش

على سبيل المثال
يوم حملت في بنتي وحده بالسانها تقول للوالده مو تو الناس على الحمال توها مالها إلا شهر ليكون حامل قبل العرس هههههههههههه
وبنت عمي لها الحين سبع شهور وزود تقول وحده لاختها اللي اهي بنت عمي الثانية ما حملت اختك ؟ قالت لها لا قالت ياختي خل يروحون يشوفون لهم صرفه يمكن فيهم شيئ
ووحده من رفيجاتي تتكلم عن وحده من معارفها تقول ان عندها ولد عمره 9 سنين وكلن يقول لها غريبه ماحملت ليكون اعجرت




؟؟؟؟؟؟؟؟؟؟؟

صج غاية لا تدرك
زاد احباطي

شخبطة 3

اليوم موضوعي عن سيارتي الله يأخذ العدو حدي منقهره

قبل اسبوعين وديتها الكراج كانت تطلع صوت ؟ خير إن شاء الله
شيكوا عليها ما فيها شيء وقبل يومين وانا امشي بسلام وادعي ربي اني ماتاخر على الدوام ومايجي ابو كرعوب اللي اهو مديرنا
اسمع السيارة تسوي تش توش تاش مثل اي يي ااهه اووو المهم هي جذي جايه ههههههههه
سفطت على جنب وقلت بشيك عليها عاد انا كلش مالي بهالسوالف دقيت على ابوي مارفع التيلفون
دقيت على ولد اخوي يقول بدوام بس اكلم لج احد يجيج انتظرت شويه
الا وقفت سيارة فيها بنت اخر شياكة عادر تعرفوون البنات هالايام فيهم حالة مصروعة مع الكشخه يغارون من اليسا وهيفا ههههههههههه قالت لي خير يا اختي عندج مشكله قلت لها المشكله شمرت عن ذرعانها وقالت خليني اشوف
وانا مصدومه قلت لها مايحتاج حبيبتي الحين بيجي احد يشوفها
قالت وش دعوى خليني اشوفها وانتي اكيد وراج داوم خليني اشوفها
قلت وانا في حاله صدمه اكبر لا يالغلا حرام تخربين كشختك
قالت ماعليج هذا مجال عملي عادي متعوده ؟؟
متعوده ؟؟
وربي افتر راسي الحين بنت هذا مجال عملها وش خلت لشباب ؟
بس والله ما قصرت عقب تشمر هالذرعان هههههههههه وعفست روحها بس من جد ماقصرت
قبل ماتخلص جاء اللي موصي ولد اخوي عليه ومشى لي الموضوع مع مساعدتها فديتها
شكرتها بقوة
وسألت نفسي مئه مره في بنت تتخصص ميكانيك ؟
والله مو عيب في الشغل بس وظيفة صعبه ؟